Simons est un poète - dessinateur - comédien du Nord (1901-1979). Ses poèmes et sketches en "ch'ti'' sont de petites merveilles d'humour et de chaleur humaine.
http://www.toudissimons.org/ SI QU' J'AVOS ETE LA
Si qu'j'avos été là, à l'premièr'nuit d'Noël,
Au lieu d'fair' comme ches gins qui claquèr'tent leu'porte
A ch'ménach'd'ouverriers - Pasc'que cha ch'est réel
Ch'étot des ouverriers - Et pis mêm'peu importe,
On choul'pas eun' pauf' femm'sur l'point d'deve'nir maman.
Si qu'j'avos été là, j'aros dit à Marie :
"Faut pas rester déhors par un si mauvais temps.
Rintrez vit'dins m'mason. Ch'est pas eune hotell'rie;
Mais vous s'rez sûr'mint mieux qu'dins ches tapis d'malheur
Qui ne r'chottent cheull'nuit qu'des graineux et des rinses
Et n'veul'tent pas ouvrir à des pauf's voyageurs.
Rintrez donc, M'sieur Joseph : ichi, c'est une bonne ceinse.
N'ressuyez pas vos pieds, j'passe'rai loque après vous.
Approchez-vous du fu; j'vas y r'mettre eun'gaillette.
Mettez-vous dins ch'fauteuil, Maritche; ch'est l'pus doux.
Donnez-me vos capuch's.... Mettez-vous à l'coyette.
Vos sorlets sont tout fréqu's; v'là des cauchons bien cauds,
L'cat i'-étot couché d'ssus.
A ch't heur' qu' vous êt's bénaches,
J'vas rintrer vo baudet dins min cothc à pourcheaux,
Et li donner quéqu's eunes d'mes pus biell's bett'raches.
Après, du réveillon, j'vas m'occuper du m'nu.
Che s'ra, j'vous l'dis tout de suite, un r'pas à l'bonn'franquette;
Mais sochez rassurés, che s'ra qua-même du ch'nu
Avant tout, pou' c'mincher, eun' petit' chuch'-mourette.
Après cha, tout boulant, eun' jatte d'lait battu
Avé des ronds d'punn's-poir's et gramint d'castonate....
Cha vous r'mettrot d'aplomb l'bonhomme l'pus réhu.
Là d'ssus, j'peux vous servir un restant d'carbonate
Qu'j'ai fait dins de l'viell' bièr'... Mais, j'ai mieux qu'cha, mes gins :
Un ragoût d'par-ichi devant l'quel on bafille :
Ch'est un lapin avec des pronne'et des rojins!
Après cha, du fromach', j'ai un carré d'vieux Lille....
Pis, j'vous f'rai des couqu's-baqu's, tout guilantes d'bon miel,
Eun' goutte d'fraich' café, et eun' petit'rincette....
V'lo-t-y pas eun' vrai' tap' de réveillon d' Noël?"
Et j'les aurons laichés, benoit'mint, tiète à tiète,
Au coin du feu, contints, dijant comm'dins un réf :
"On est queue dins l'mason d'un garchon bin honnête.
T'es bien, m'petit' Marie? - Ouais, j'suis fin bien, Joseph.
L'souv'nance d'cheull' biell' nuit, che s'ra un jour de fiète".
Et p't êt' bien qu' de ch'jour-là, ch'arot été la mote
D'inviter un pus pauf' à s' tap' de réveillon;
Pasc'que mêm' pour les pauf's, i' n'a toudis un aute
Incor pus miséreux.
Ch'tot eun'bielle occasion
D'donner un peu d'plaisi, et d'un r'chevoir gramint.
C'est pas à ch'ti qui r'chot, mais bin à ch'ti qui donne
Que va toudis l'gross part du meilleur contint'mint.
Che s'rot dev'nu la mot' si c'soir-là eun' personne
Avot amiteus'mint r'chu Joseph et Marie,
Pour que l'petit Jésus nous arrife ichi-bas
Dins un biau lit tout blanc au lieu qu'dins un' pourchie.
Ch'est ch'que j'aros fait, mi, si qu'j'avos été là.
(Recueilli dans Lille aux Lillois, 1992 - association Toudis Simons)
